إزاي تزيد عدد الزوار لمدونتك أو موقعك

لسلام عليكم
ممكن اتنين يعملو مدونة ، زي بعض تقريبا ، واحدة يدخلها الاف الزوار شهريا ، والتانية زوارها يتعدوعلى اليد.
الاختلاف بينهما بتبقى أشياء بسيطة ،لكن بتفرق جامد
إليك بعض النصائح اللي ممكن تزود بيها عدد الزوار لموقعك.

1- اهتم بـمحتوى موقعك او مدونتك:
بدل ما تفضل تنقل في مواضيع من منتديات ومدونات تانية ، حاول تكتب مواضيعك بنفسك. ممكن تاخد منك وقت في الاول ،لكن موضوع أنت كاتبه بنفسك -حتى لو بسيط جدا- ، يجيبلك زوار اكتر من عشرين موضوع منقولين.

2- شكل الموقع او المدونة مهم:
لكنه مش كل حاجة . خلي في توازن بين الشكل والمحتوى.
الشكل الجميل والبسيط يساعد الزائر أنه يفضل في موقعك فترة أطول ، ويزوره أكتر.

3- تحديث مدونتك باستمرار:
الزوار دايما بيبقو مستنيين مواضيع جديدة من المواقع والمنتديات. الموقع اللي مواضيعه الجديدة قليلة ، بيفقد شعبيته يوم بعد يوم.
تخيل لو أنت بتحط موضوع جديد يوميا. متابعي موقعك هيدخلو كل يوم وعندهم شغف يشوفو ايه الجديد اللي بيقدمو موقعك النهارده. بخلاف لو بتحط موضوع على فترات متقطعة ، الزائر هيدخل النهاردة مش هيلاقي حاجة جديدة ، يدخل بكرة برضو مفيش جديد ، بعد كده مش هيتعب نفسه.

ومش بس الزوار بيحبو التحديث المستمر ، جوجل كمان بيحب المدونات اللي محتواها متجدد باستمرار ، وبينظر ليها كمدونات نشيطة ، وتظهر في نتائج البحث قبل غيرها

4- حط فيديوهات في مدونتك:
في ناس كتير تحب تتفرج على فيديو بدل القراءة. حاول تدعم موقعك بفيديوهات ، لكن خلي بالك ... متعتمدش بالكامل على الفيديوهات بس ، لأن في مواقع مخصصة للفيديوهات زي اليوتيوب بالتأكيد موقعك مش هيبقى جنبها حاجة.

5- حط مواضيع جذابة:
يعني مواضيع الشرح للبرامج ، او مواضيع صورة وتعليق ، مواضيع القوائم "زي قائمة بأغنى عشرة في العالم" ، مواضيع النقد الساخر ، ومواضيع التعليق على كتاب أو فيلم .... كل دي وأخرى مواضيع جذابة للقارئ ، لكن أرجع أؤكد على أهمية ان يكون الموضوع من ابداعك وليس منقول.

6- شارك في مواقع التواصل الاجتماعي:
زي الفيس بوك ، تويتر ، والمنتديات. خليك عضو مشارك بنشاط ، وحط موقعك في التوقيع مثلا ، وتلقائيا الناس لما تلاقيك عضو نشيط هيحبو يشوفو موقعك.

7- خصص جزء في موقعك للتفاعل مع الزوار:
مثلا خصص صفحة لطلبات الزوار. أنا مثلا عامل صفحة لطلبات الشروحات أو سؤال أسئلة عن التكنولوجيا
اطلب شرح برنامج او اسأل سؤال

8- خد رأي الزوار في مدونتك:
ممكن عن طريق التصويت تحط استفتاءات عن رأي الزوار في مدونتك
مثلا رأيهم في الشكل ، في سرعة الموقع ، في اضافة قسم معين .... الخ

9- حط محتوى مختلف عن محتوى الموقع كل فترة:
مثلا أنا مدونتي عن التقنية ، لكني حاطط فيها جزء اسمه "بعيدا عن التقنية".
التغيير شيء مهم لكل انسان وطبيعة مزروعة فيه ، لذلك متخليش مدونتك على نمط واحد طوال الوقت. في نفس الوقت متنساش نفسك وتفضل تحط مواضيع لا علاقة لها بمدونتك ، يعني حط موضوعين مختلفين عن توجهات مدونتك كل شهر للتغير فقط.

ارجو أن أكون أفدتكم
في انتظار تعليقاتكم